AHAGHỊ OTU NKE JENDA NA NJIKỌTA ỌNỤ NKE MBA NIILE: ỌKACHASỊ N’OKPURU ỌCHỊCHỊ BENDE NA STEETI ABỊA

Abstract

Ihe ọmụmụ a bụ maka ahaghị otu nke jenda na njikọta ọnụ nke mba niile ọkachasị n’okpuru ọchịchị Bende nke Steeti Abịa. Jenda bụ nkọwa doro ọha mmadụ anya banyere njirimara nwoke na nwaanyị. Anaghị akọwa jenda n’usoro ndụ n’ihi ihe e jiri mara nwoke maọbụ nwaanyị mana e ji ihe doro ọha mmadụ anya akọwa jenda. Ọ bụ iwu a haziri ahazi zuru ọha ọnụ ma oge ụfọdụ na-achịkwa usoro mmepụta na mmepụtakwa, nkesa na oriri n’ụzọ ọrụ ọ na-arụ. Ihe gbasara jenda na-agbakwasi ụkwụ na mmekọrịta dị n’etiti nwoke na nwaanyị, ọrụ ha na-arụ, ụzọ mbanye, nakwa njikwa n’ihe gbasara akụ na ụba, ike ọrụ, mmasị na mkpa. Ahaghị otu nke jenda pụtara echiche na ụzọ e si egosịpụta na nwoke na nwaanyị ahaghị otu. Ọ na-egosịpụta site n’akpamoke, ma nke pụtara ihe ma nke ọha mebere. Ụmụnwaanyị na-anọkarị n’azụ ụmụnwoke n’ọtụtụ ihe dị iche iche tinyere agụmakwụkwọ, ịchọ ọrụ, ebe a na-achọ ohere dị iche iche na nnọchị anya n’ebe ọchịchị nọ. Ahaghị otu nke jenda bụ ihe juru ebe niile n’ala anyị. Iji gabiga nsogbu nke a, obodo kwesịrị ileba ya anya. Mbunuche ihe ọmụmụ a bụ ileba anya n’etu ahaghị otu nke jenda si emetụta ndị bị n’okpuru ọchịchị Bende nke Steeti Abịa. Ihe a chọpụtara gosịrị na anaghị emesa ụmụnwaayị omume etu e si emesa ndị nwoke n’ụzọ nhataha n’obodo. Ahụghị ụmụnwaanyị dịka ndị dị mkpa n’obodo kama a na-ahụ ha dịka ndị a ga-ahụ anya ọ bụghị ndị a ga-anụ olu ha. Nke a na-emetụta mmpe obodo na njikọta aka ọnụ nke mba niile. Ndị nchọcha tụnyere arọ na e kwesịrị inwe jenda ha otu nke ga-enye onye ọbụla nọ n’obodo ohere ịha otu n’ụzọ dị iche iche dịka ọrụ, agụmakwụkwọ na ndị ọzọ. Ụzọ dị etu a ga-eweta mmepe n’obodo anyị nakwa ala anyị niile.